【Now財經台】下周二(17日)就係大年初一，去年內地春晚人形機械人表演歌舞令人印象深刻，帶挈呢個宇樹科技嘅機械人爆紅，其後A股春節假後復市，機械人、算力硬件、AI應用板塊有一輪炒作。宇樹今年繼續係春晚機械人合作伙伴，會唔會重演一波機械人相關股炒作潮？
元宇證券基金投資總監林嘉麒認為，再出現呢類炒作機會唔大，去年春晚宇樹機械人表演有新鮮感，令投資者開始發掘相關股份，但去年已出現過跳舞、格鬥、運動等嘅機械人，市場已消化機械人嘅前景預期。
KK又話，依家係機械人2.0階段，條件苛刻，如果今年春晚有未炒過嘅題材，又係去年冇炒過嘅機械人概念股，可能先有得炒。佢續指，市場氣氛上，一定唔會有首次亮相時咁犀利，但要靠春晚炒起個股，甚至成個板塊氣氛，就唔好抱咁大期望。
