【now.com財經】仲有唔夠兩星期就係馬年大年初一，金融機構、大行嘅馬年股市預測陸續出爐，散戶做馬年投資部署時可以參考一下，最新有中信里昂馬年風水指數。
該行指，恒生指數屬「土雞」，但今年係「火馬年」，但喺熾熱嘅火能量加持下，會為「土雞」命盤帶來吉運，又認為有火氣注入，可以調和整體格局，令前景更璀璨。
回顧過去4個馬年，恒指喺其中3個馬年都平穩增長，估計今個馬年恒指將會穩步上升，雖然年初可能會回落，但4月後會逐步升返上去，下半年走勢則呈「進兩步，退一步」格局，又預期恒指會喺11月至12月初見馬年高位。
行業方面，中信里昂估計，屬木嘅家具及醫藥喺馬年有運行，屬火嘅通訊及能源都「得勢」，不過，屬土嘅房地產就較難獲得加持。
