【Now財經台】日本將會喺周日(8日)舉行眾議院選舉，近期日圓彈得好急，之前一度彈上152水平，每百日圓兌港元重上5算，但近日又轉弱，最新跌穿5算，美元兌日圓升至156.3水平，如果新年會去日本旅行，係咪應該依家唱Yen？
外匯策略專家張建泰指，如果純粹旅行用途，依家可以唱定先，市場普遍預期高市早苗將會大勝，有利佢推行「新安倍經濟學」，但要留意，一旦美元兌日圓再轉弱，而情況又持續，日本政府或美國聯儲局可能會出口術遏日圓跌勢。
Ken又指，與其博大選後日圓更弱，倒不如依家就唱定日圓先，一旦大選結果爆冷，日圓可能會大幅反彈。
