【Now財經台】美國總統特朗普(Donald Trump)最終提名前聯儲局理事沃什(Kevin Warsh)做下任主席，睇返佢嘅「往績」，過去以「鷹派」立場見稱，點睇特朗普今次嘅選擇？若落實沃什接任，美息未來會點走？
華僑銀行外匯及利率策略主管張淑嫻指，沃什相對其他候選人係冇咁鴿，但又未去到「鷹派」，佢打擊通脹嘅立場好清晰，所以預期佢唔會過度減息。
Frances又指，沃什主張縮表目的係減少負債，因為銀行儲備佔負債好大部分，依家有約3萬億美元銀行儲備lock咗入資產負債表，流唔到去實體經濟，所以希望降低銀行儲備息率，以減少銀行儲備，釋放資金，但有好多學者及聯儲局官員對呢個理論持保留態度。
佢續稱，依家聯邦基金利率已去到較中性嘅水平，所以暫時預期今年只減息1次，由於美國就業數據未來好大機會仍然疲弱，因此，聯儲局可能會喺3月減息。
