【期匯決算】點解委國變天美債市咁平靜？

【Now財經台】委內瑞拉變天，刺激金價造好，美匯指數則7連升，迫近99關口，係咪同避險情緒升溫有關？不過，美國債市未見出現動盪，市場點睇今次事件？

ATFX亞太區首席分析師林銘添指，今次涉及美國軍事行動，對美元有利，因為喺避險情緒升溫下，資金部分流向美元資產，但佢強調，美元強勢可以維持幾耐，仍要視乎經濟基本面等因素。

Martin又話，美國債市反應相對平靜，主要係債市走勢受利率及通脹前景主導，依家市場最關注係美國快將出爐嘅數據。佢相信，喺數據公布前，匯市及債市將保持平穩，唔會出現太大突破。