【now.com財經】唔少港人都鍾意食蕃茄炒蛋，依家本港大部分蕃茄主要來自內地及本地，歐洲及其他地區佔比相對較細，蕃茄炒蛋一向係親民嘅餸菜，但最近內地蕃茄「身價暴漲」，最終會唔會影響埋香港？
據內媒報道，喺四川嘅農貿市場及超市，蕃茄價格較以往貴咗50%，甚至同豬肉價格差唔多，更有指買1斤蕃茄嘅價錢可以買到2斤雞蛋，係咪蕃茄炒蛋嘅食材比例都要調整一下？報道話，成都已經有食肆「變陣」，將蕃茄炒蛋變身「青瓜炒蛋」應對。
睇返農業農村部信息中心數據，今年12月12日至18日期間，重點監察嘅19種蔬菜價格，其中，蕃茄同包括青椒在內另外4種蔬菜比較，蕃茄按月升幅最大，超過7%，按年更飆逾70%。
業界話，蕃茄價飆主要受天氣等因素影響，又估計最少要1至2個月時間，因供應緊張價格不斷上升嘅情況先會有改善。
