【Now財經台】小鵬汽車(09868)股價近排持續弱勢，暫時已連跌4日，今日(18日)低開逾2%後，跌幅一度擴大至3%，低見70.1元，之後跌幅收窄，跌至約5個月低位。小鵬弱勢下，淡友係咪較進取？條款又點揀好？
中信證券國際股權衍生品銷售經理李碧珊指，雖然小鵬業務廣泛，但一直冇消息支持到股價，由於PUT輪及熊證條款唔算吸引，加上股價近期由110元直插至70元水平，所以淡倉都唔太活躍。好倉方面，由於CALL輪個窩大部分介乎60至70水平，用實際槓桿做比較牛證會更吸引。
Percy又話，小鵬3個月場外期權嘅引伸波幅走勢相對於11月，已回落咗逾10個波幅點，亦貼近低位，因此，較多好友趁機部署弱勢股，由於小鵬嘅窩本身較高，條款上建議揀得進取啲，明年6月底到期，價外50%以上，先可以做到4倍以上槓桿。
