【Now財經台】據英國《金融時報》報道，私募信貸公司Blue Owl Capital唔會參與甲骨文(Oracle)位於密歇根州，規模達100億美元嘅數據中心投資，雖然Oracle之後發聲明澄清，但股價昨晚(17日)收市仍挫5%，呢個消息令市場對大型人工智能(AI)基建投資嘅憂慮，喺AI相關股拖累下，納指收市大跌1.8%。
鴻鵠資產管理行政總裁陸庭龍指，過去不斷傳出AI基建投資加碼消息，最高可以去到過千億美元，其實背後都係由私募基金呢類大型投資者推動，當市場冷靜落嚟，就憂慮AI泡沫，擔心產出不似預期，但對市場嚟講反而係一件好事。
Alan解釋，呢啲私募基金嘅資金，主要來自大型機構及家族辦公室等，若投資金額大，但風險管理達唔到預期就會影響資金重組，所以Blue Owl Capital縮沙都係意料之內，佢又認為，今次唔會係單一事件，只係Oracle名氣大，特別受市場關注。
