【Now財經台】智能駕駛概念股今日(16日)表現唔錯，普遍逆市向上，其中，佑駕創新(02431)午後一度大升逾14%，高見11.45元，係咩原因股價今日升得咁靚？集團幾時可以達至盈虧平衡？
元宇證券大中華區股票投資總監趙晞文指，佑駕股價今日大升，主要係有短期消息面及股價催化劑，佑駕同行業龍頭地平線機器人(09660)係戰略合作伙伴，而喺地平線機器人稍後舉行嘅技術發布日，將會有更多解決方案資訊披露，呢個合作可以為佑駕帶嚟增長潛力。
晞文又話，佑駕研發投入大，如果收入增速唔進一步加快，就會影響其他營運開支及研發，佢又估計，如果佑駕明年收入增速可加快至介乎50%至60%，就有機會可以達至盈虧平衡點。
