【Now財經台】恒生指數今日(16日)已落到牛證重貨區，向下亦有層層牛證，向上最少要上返26000點先有資金部署熊證，而科技指數都落到250天牛熊線，恒指幾時會出現技術反彈？不過，睇返港股3大指數，依家9天相對強弱指數(RSI)全部喺30或以上，唔算好超賣，短期有冇機會博反彈？
天風國際李偉傑表示，港股下跌係承接A股嘅跌勢，港股及A股走勢敏感度好高，依家港股一浪低於一浪，反彈力度亦進一步轉弱，情況係令市場擔心。此外，外圍投資者等消息亦令港股近期避險情緒升溫，風險胃納相應減低，估計恒指暫時要喺下方一啲支持位捱下。
Jason又話，市場十分關注日本央行議息結果，Carry Trade(套息交易)拆倉一定會影響市場，依家要觀察一旦拆倉會唔會震盪到環球股市，因此，恒指25000點可以暫時捱住先，最緊要唔好失守24800點，否則，大市調整壓力會進一步加大。
