【Now財經台】南方國指備兌Covered Call交易所買賣基金(ETF)(02802)上周四(11日)正式喺本港掛牌，同Global X國指備兌(03416)一樣標榜每個月派息，但睇條款，呢隻新產品嘅管理費就略高，加上剛剛掛牌，仍未知派息水平係咪吸引，條款上有咩賣點？揀國指做Covered Call又有咩好處？
獨立市場策略師何啟聰指，呢兩隻Covered Call最大分別係管理費及全年經常開支比率，但新上市嘅股份可參考數據唔多，好難比較收盈表現，不過，要留意南方國指備兌Covered Call ETF係主動型ETF，基金經理會視乎情況決定喺咩價位嘅行使價沽出，因此，基金經理策略有可能影響收盈。
至於揀國指Covered Call嘅好處，Ivan就話，國指期權嘅延伸波幅水平屬中間偏高，意味收盈亦屬相近水平，但都要視乎價格波幅，如果沽咗期權後，價格波動率好大，就可能影響最終收盈，而國指期貨每個月嘅波幅唔大，就可避免呢個情況發生。
