【有冇用過？】「掃地機械人始祖」iRobot申請破產

【now.com財經】市場之前擔心人工智能(AI)會出現泡沫，甚至爆破之際，機械人界突然傳嚟「噩耗」。

據外媒報道，有35年歷史嘅美國「掃地機械人始祖」，消費型機械人企業iRobot，最終敵唔過日趨激烈嘅競爭，昨日(14日)聲請破產。

iRobot旗下著名掃地機械人品牌Roomba，喺1990年由3名麻省理工學院(MIT)工程師創立，累計賣出逾5000萬個機械人，但2021年起盈利開始走下坡，其中1個原因係競爭不斷加劇。