【Now財經台】美國科技股上周五(12日)集體「跳水」，上周四(11日)急瀉近11%嘅甲骨文(Oracle)，上周五收市再挫逾4%，業績交到貨嘅博通(Broadcom)更瀉逾11%，英偉達(Nvidia)跌逾3%，其中，雖然博通上季多賺97%，好過預期，但市值仍喺兩日內蒸發逾2000億美元，係咪反映科技股投資氣氛差，依家係咪執平貨嘅好時機？
星展銀行(香港)豐盛私人客戶執行董事鄧威信指，市場的確對科技股態度更審慎，但仍對業績期望好高，加上市場對科企高估值有戒心，所以就算業績理想，股價都可能反應唔大。不過，其實科技股已累積好大升幅，出現回調係正常，但科技股暫時仍然係增長最好嘅板塊之一，未有其他板塊可以取代，佢又相信，若業績能支持股價長遠升幅，呢啲科技股可以更低、更合理估值吸引更多資金回流。
