【Now財經台】一直有傳李寧(02331)有可能私有化，或者有併購動作，大股東李寧已連續4個交易日大手增持，涉資逾3億元，持股量升至14.81%，同市傳聞併購PUMA，甚至私有化有冇關係？
信達國際研究部助理經理陳樂怡表指，投資者要留意李寧未來嘅增長動力，同埋潛在併購消息，例如會唔會透過收購具競爭力品牌彌補不足之處。至於大股東連番增持，佢認為，只係對股價提供短線支持，又認為暫時距離私有化仍比較遙遠。
Tracy又話，如果股價係基於私有化憧憬，升幅唔止咁小，股價暫時只係區間上落格局。佢續指，市場未來會關注公司喺同業加大折扣力度，同埋國際品牌搶攻低價市場下，李寧點樣應對及擴大市佔率，將十分關鍵。
