【Now財經台】歐盟昨日(9日)宣布再對Google人工智能(AI)服務展開反壟斷調查，重點調查Google係咪濫用搜索引擎嘅主導地位，扭曲AI市場競爭，歐盟懷疑Google將供應商內容使用於AI服務，但未有提供合理費用，供應商礙於流量考慮，亦要繼續使用Google搜索引擎，但事件似乎冇明顯影響母公司Alphabet股價？
獨立股評人莫灝楠指，歐盟暫時只係調查Google，而呢類案件嘅調查、審判及裁決等過程需時較長，Google幾年前亦因為Google Chrome瀏覽器捲入1宗反壟斷案，但案件到今年9月先有最終裁決，相信今次嘅情況都差唔多，預期Alphabet股價只係短暫受壓，可能要等案件有重大進展，先會對股價有明顯影響。
佢又話，歐盟嘅指控唔係完全無理，始終Google係全球主要搜尋器之一，Google將佢嘅AI服務連接至Google搜索引擎，令收集資料變得好容易，繼而阻礙競爭。
