【Now財經台】美國聯儲局將於本港時間周四(11日)凌晨3點，公布今年最後1次議息結果，據上周公布嘅「小非農」就業數據顯示，11月私人企業職位減少3.2萬個，同市場預期嘅1萬個相差好遠，反映就業市場進一步惡化，市場預期聯儲局將減息0.25厘，不過，除非局方大手減息，否則，唔可以急速改善經濟，聯儲局有冇條件大手減息？
智安投高級財富顧問何展峰指，美國11月經濟數據差過預期，加上就業市場不斷惡化，聯儲局減息已成定局，但根據過往經驗，減息步伐太快，通脹就會升溫，現時美國通脹仍未回落到聯儲局2%嘅目標水平，喺呢個情況下，估計聯儲局未必會大手減息，當然，亦要視乎未來嘅經濟數據表現。
展望明年美息走向，Edwin指出，投行嘅減息預測分歧大，所以暫時難以估計明年嘅減息政策，但預期經濟政策將持續偏向寬鬆，相信加息機會唔大。
