【Now財經台】中央政治局會議昨日(8日)召開，但恒生指數昨日收市瀉逾300點，再度失守26000關，點解會議對大市冇利好作用？
星漢資產管理行政總裁王榮昆表示，主要係今次政治局會議提及嘅關鍵字冇市場預期咁寬鬆，上次會議提及「超常規」跨周期調節，但今次就冇咗「超常規」呢個字眼，市場原本預期2026年會有「超常規2.0」或「大水漫灌」，但暫時嚟睇唔係行緊呢個方向。
James又認為，依家中央政治局追求嘅財政政策方向係跨周期嘅平衡點，而唔係令市場驚喜嘅刺激措施，當冇驚喜喺背後支撐，市場自然唔覺得今次政治局會議，會為下年財政及貨幣政策帶嚟太多驚喜，亦唔覺得估值會因宏觀因素而提升。
