【Now財經台】本港新股市場今年十分旺場，截至今日(5日)止，已有93隻新股成功掛牌，集資逾2600億元，來到12月仍有新股趕搭「尾班車」，其中，遇見小麵(02408)及天域半導體(02658)今日首掛，但股價齊齊「潛水」。展望2026年，依家排隊等批嘅新股數以百計，預示明年港股IPO會繼續熾熱，散戶揀新股時有冇咩竅門？
高歌證券金融首席分析師聶振邦指，自新股制度改革後，由於公開發售部分配額少咗，變得非常抽，所以多咗散戶借孖展抽新股，希望可以成功抽中，甚至派多幾手，但要留意，若上市後表現不似預期，就有機會輸錢。
揀股方面，聶Sir建議，可以考慮招股規模相對細嘅新股，雖然未必抽得中，但唔會揸到成手蟹貨，造成更大損失。佢又話，散戶都可以留意孖展熱度，一般500倍以下孖展認購相對少啲，如果招股第2日已有1000倍，熱度較強就可以放膽少少去抽。
