【Now財經台】廣汽集團(02238)股價繼日前大升後，今日(2日)又「開車」，一度大升逾10%，高見4.38元，值得留意係，集團宣布明年量產搭載全固態電池車款，股價今日爆上係咪同呢個消息有關？全固態電池車定價又點睇？
元宇證券大中華區股票投資總監趙晞文估計，固態電池應該要兩三年後先會大規模商用，廣汽今次帶埋新產品亮相廣州車展為市場帶嚟驚喜，但後續要留意研發進度，同埋點樣導入旗下車款。
佢續指，由於明年只係小規模試產階段，大規模生產係2027年以後，除咗有望降低上游採購成本，規模效益亦會逐步體現，相信固態電池生產成本要去到2029年先見到規模效益，又相信定價唔會太平。
