【now.com財經】日本央行之前似乎暗示會加息，資金會唔會湧入高息股避險，揀股又有冇咩指標？中特估概念股係其中一類高息股，除咗最大路嘅內銀、電訊及油股，其實仲有一啲相對冷門，例如綜合企業、基建、公路股，都係平日少啲人講，呢啲股份係咪都有吸引力？
天風國際李偉傑指，港股嘅高息股或防守股可以望住2個指標，首先睇美國10年期債息，依家喺4厘樓上，若個別股份股息有逾5厘，表現都好硬淨，其次睇本港1個月拆息，今年5月突然急挫，明顯見到高息股爆升，近期1個月HIBOR喺2.8厘徘徊，都有利提升高息股替代性。
Jason續指，中特估概念股重點係股息率高、派息穩定、估值平，其中，基建及高速公路股過去半年一直跑贏大市，以四川成渝高速公路(00107)為例，派息比率逾60%，但亦要留意呢類股份都幾受經濟周期影響。
