【now.com財經】陪伴唔少香港人成長，有57年歷史嘅「茶記名物」頂好大光麵，下個月將完成「歷史任務」停產，生產商金源食品今朝(26日)同大家「告別」。
金源食品喺社交媒體指，「味道會完結，但回憶會一直留著」，又話係經過多番考慮才作出呢個艱難嘅決定，公司又指，「能夠成為大家嘅日常，係我哋最大嘅幸福」，不過，亦有網民認為大光麵市場定位好怪，一直只供貨畀茶記，唔做零售。
消息一出，有唔少人留言話唔捨得，更喺Threads洗晒板。
網民有咩「臨別感言」？
「今次真係世界末日，香港最好食嘅即食麵，唔係丁麵，唔係福麵，係頂好大光麵！」
「我要食多一次，仲有邊度有得食？」
「大光麵市場定位好神奇，今時今日仍只面向茶記，唔做零售，單一客源又畀對手搶市場，好似打模擬公司Game開困難mode咁，好難唔棄Game。」
「以後要加5蚊食丁麵了！」
「但其實好多茶記都轉咗用東和麵。」
