【Now財經台】金力集團(03919)配股集資，配股價1元，配發648萬股新股，較上周五(24日)收市價折讓約13%，集團股價今日(27日)一度飆48%，高見1.71元，點解股價今日會大升？
《香港股票財技密碼》作者梁杰文指，相信股價今日大幅炒上同概念轉型有關，世界整體大方向都係電動車相關行業，公司以往做開一啲傳統電池，依家就話集資其中一方面係做電動車快速電池，唔多唔少都比到市場憧憬。
Mike又話，金力呢年股價一直都喺低位徘徊，可以話係跌到殘曬，而市值亦只係幾千萬，相對每股資產淨值都有大幅折讓，雖然最近因中美貿易緩和彈起，但佢對金力後續走勢有保留，今日股價高開衝高咗，但升幅好快收窄，亦反映市場對公司中長線前景仍有疑慮。
