【Now財經台】截至早上11時止，1小時內《彭博》用戶搜尋量最多嘅港股，依次為泡泡瑪特(09992)、美團(03690)、李寧(02331)、古茗(01364)及巨子生物(02367)。
泡泡瑪特公布第3季整體收期益按年最多增長2.5倍，雖然銷售keep到高增長，但股價仍然冇乜起色，昨日(22日)市反彈逾2%後，今日(23日)又跌過，更失守235元水平呢個重要支持位，集團一向係北水「愛股」，雖然昨日淨買入2.4億元，但全日沽空金額高達17億元，佔比約22%，亦係沽空金額最多嘅港股，泡泡瑪特自9月8日正式「染藍」後，股價至今累跌約20%，點解讀呢個情況？
香港股票分析師協會副主席曾永堅指，泡泡瑪特股價今年升咗唔少，「染藍」效應亦逐步減退，若年初部署咗泡泡瑪特嘅投資者，依家已有足夠誘因獲利，加上新產品炒價下跌，令市場憂慮Labubu熱潮可能已減退，影響市場對公司未來銷售持續高增長嘅信心，並擔心公司股價或估值可能已過高，因而率先獲利鎖定利潤，令沽空壓力加大，因此，即使集團季績超預期，都難以推升股價。
Jaseper又指，睇返技術走勢，220元係短線關鍵位，但如果市場持續擔心Labubu炒作效應減退，股價有可能回落至180元水平。
