【Now財經台】在避險需求升溫下，金價不斷破頂，最新突破每盎司4300美元，唔少大行繼續唱好，追蹤金價嘅SPDR金ETF(02840)今日(17日)跟隨破頂，一度高見3115元，升2.8%，金價持續強勢，市場上唔少價外產品都已經愈來愈貼價，熱門嘅產品價外幅度唔夠5%，但輪價就偏高，如果睇好金價繼續升，條款上應該點揀？
星展香港環球金融市場上市產品主管周國威指，近期金價上升動力相當強，若想博金價繼續向上，不妨考慮行使價較貼價約3200元，明年2月底到期嘅條款，槓桿可以做到10倍，另有較長身嘅CALL可以選擇，明年9月至27年1月到期嘅條款，有約10%嘅價外幅度，亦唔算遠，但槓桿較低，做到5至6倍。
