【Now財經台】停牌約兩周嘅創陞控股(02680)今日(13日)復牌，股價一度逆市飆逾76%，高見10元。要約人王庭發向公司主席收購全部股份，涉資2.7億元，要約價每股6元，較停牌前有約6%溢價。值得留意係，一般嚟講，殼價易手都有折讓，但今次反而有溢價，點解讀呢個情況？
《香港股票財技密碼》作者梁杰文認為，近期好多殼價都較市價有折讓，可能同賣家或大股東有資金鏈問題有關，佢相信，創陞嘅情況可能係公司近期發咗盈喜，貨源又非常集中，除大股東持有公司75%股權外，餘下嘅公眾股東都係友好人士，導致街貨較少，令買家願意以溢價買殼。
Mike又認為，全球金融市場近年有一股大勢力，就係「量化交易商」或「量化交易員」，佢哋喺市場上十分活躍，交易規模及佔比都不斷上升，佢估計，由於新主王庭發有呢方面經驗，加上內地人身份有帶動北水憧憬，所以創陞前景會更上一層樓。
