【Now財經台】時富金融(00510)上星期指，大股東時富投資(01049)旗下CIGL正跟一名獨立第三方，就出售時富金融若干股權嘅潛在交易進行磋商，不過，時富金融今日(8日)中午公布，指有關磋商已終止咗，兩隻股份下晝復牌一度急瀉52%及逾32%，成件事只係經歷咗5個交易日，通告冇提及任何細節，點分析極速撻Q嘅原因？
元宇證券基金投資總監林嘉麒相信，當中應該涉及好多原因，外界亦好難估計，以價錢為例，當公司股價喺短期內急升，喺大股東嘅角度，作價同市值未必要有好大距離，但基本上係需要利好消息，股價先會急升，值得留意係，如果喺以往，未必會畀好高嘅市帳率(PB)，因為買賣係根據PB、過往收入、盈利或活躍客戶群數量去定價，所以係未必畀到股票市場嘅市值，相信作價都有可能係影響磋商嘅原因。
