【Now財經台】四中全會將於10月20日至23日喺北京召開，屆時會審議「十五五」規劃建議，市場關注中央會唔會再加大力度，推進科技自立自強、新質生產力、內需及消費、綠色轉型及民生等發展。
資深銀行家王仕雄認為，中央一定會繼續加大力度，尤其數碼經濟，佢估計，人工智能(AI)、雲端及量子呢幾大範疇會再出現突破，對新質生產力及未來發展方向會有好大幫助。王仕雄續指，現時內地喺新能源及綠色經濟嘅發展已經超前，未來要繼續保持超前地位，目標係2030年前要達至碳高峰，2060年前就實現碳中和。
佢又稱，內需及消費係重中之重，由於現時全國儲蓄數字高企，所以有足夠子彈推動內銷，只要社會保障包括醫療、教育做得更好，以及可以穩住樓市，都有助提高消費者信心。
