【now.com財經】英偉達(Nvidia)掟50億元入股英特爾(Intel)，除咗帶挈Intel股價爆升外，亦有另一個「投資者」賺到笑，更急急喺網上大晒「戰績」。
呢個「投資者」大賺嘅好消息，係由美國總統特朗普(Donald Trump)喺佢旗下嘅社交平台Truth Social發布，仲upload咗1幅疑似由人工智能(AI)生成，顯示Intel股價暴升嘅圖片，睇到Intel股價由美國政府入股時20美元，暴升至30美元，美國政府喺1個月前入股Intel約10%，依家帳面勁賺逾43億美元，折合約340億港元。
