【Now財經台】丘鈦科技(01478)向印度電子科技龍頭Dixon出售子公司印度丘鈦逾51%股權，作價近4.5億人仔，交易完成後，丘鈦仍持有逾48%股權。受消息帶動，丘鈦股價今日(18日)一度升逾5%，高見14.95元。集團嘅通告提及印度丘鈦估值約32倍，對比母企現價市盈率(PE)約57倍，對比預測PE就約22倍，大概介乎兩者之間，到底係賣平定賣貴？
艾德金融執行董事陳政深指，如果同規模大嘅印度同類上市公司，PE介乎32至52倍比較，作價算係合理，但如果計及逾40%嘅交易折讓，再考慮埋出售份額大，以及買方都係上市公司，綜合嚟講作價係合理但偏貴。
至於今次係咪揀啱好時機做呢單deal，Ryan就話，今年7月印度丘鈦估值約15.5倍，對比現時嘅32倍，足足升咗逾1倍，佢相信同行業景氣好及外界睇好印度市場有關，加上基本因素亦唔會喺短短2個月間大變，所以今次係一個出售好時機，對丘鈦嚟講亦係一單好deal。
