【Now財經台】新股健康160(02656)今日(17日)首日掛牌，股價大幅炒上，集團今次發行逾3364萬股，當中僅10%喺香港公開發售，超額認購逾750倍，就算行使超購配股權，再多發15%股份，公開發售股份都只得約504萬股，而集團最終以下限11.89元定價，至於國際配售就超購1.92倍，喺冇強制回撥機制下，公司最多都係酌情行使超購配股權，點分析呢個安排？
元宇證券基金投資總監林嘉麒指，健康160會唔會行使超購配股權，其實係視乎價位，如果個價好高，市場又滿意，咁公司就未必要行使超購配股權。
KK續指，喺正常情況下，當公司上市後，見到市場氣氛咁好，唔會無端端增加股份數量，攤薄現有股東利潤，不過，如果公司有其他考慮，例如希望增加流通量，或者認為某啲基金可以幫到公司未來發展，先至會多發15%股份，甚至將舊股配新股畀佢哋，但KK認為健康160應該唔會咁做。
