【Now財經台】「股神」巴菲特(Warren Buffett)喺上季買入約500萬股聯合健康(UNH.US)，如果以上季最高位606.3美元計，涉資31億美元，若以上周五(12日)收市價352.5美元計，已較高位回落逾40%，如果現價買入聯合健康，應該會平過「股神」嘅入貨價，但集團問題多多，如果純粹一個平字，係咪一個有力嘅理由去買入聯合健康？
iFast Global Markets副總裁溫鋼城指，聯合健康股價由之前一度跌至200美元水平，之後大幅反彈50%至逾300美元，反彈動力源於「股神」掃貨，令市場對呢隻股份有憧憬，市場甚至認為「股神價」就係「好價」，但其實一隻股票平定貴始終要睇前景。
Harris又指，受規管問題影響，聯合健康上半年盈利倒退40%，估計下半年倒退幅會擴大至約60%，如果現時買入博股價見底反彈，佢認為唔值博，又認為集團受好多不明朗因素困擾下，投資者捉接住「一把跌緊落來嘅刀」有好大風險。
