【Now財經台】中美喺西班牙進行新一輪貿易談判，最新傳來好消息，雙方已就TikTok問題達成初步框架協議，而中美元首將會喺周五(19日)通話，確認協議嘅具體細節，最終可以達成共識嘅機會大唔大，點評估後續發展？會點影響股市？
滙豐私人銀行及財富管理亞洲區首席投資總監范卓雲指，中美就TikTok問題達成框架協議，反映雙方對達成全面協議嘅意願都好大，亦為中美達成全面協議奠下基礎，踏入第4季，市場繼續觀望中美元首會否再有更多唔同層次嘅接觸，有利市場進一步降低中美貿易摩擦嘅風險溢價，亦反映年中嘅中美貿易摩擦及緊張局面得到緩和，帶動A股及港股回升。
范卓雲又估計，中美年底前達成某種形式貿易協議嘅機會較高，因此，滙豐私人銀行對中國股市維持偏高配置嘅投資觀點。
