【Now財經台】天岳先進(02631)今日正式獲納入港股通，刺激股價大升兼破頂，今早(15日)高開逾7%後，升幅一度擴大至逾18%，高見68.5元，天岳先進主要業務係生產「碳化硅襯底」(SiC)，係一種高性能晶片嘅原材料，不過，依家公司最大客戶唔再係內地創新基礎設施公司，已轉為德國汽車晶片廠商，點睇呢樣晶片原材料前景？
博威環球證券金融首席分析師聶振邦認為，SiC相對於常用嘅多晶硅電流及電壓承受能力更高，熱能力亦較強，相信用SiC製造嘅晶片需求會較大。此外，以現時集團海外收入佔整體逾40%估計，海外業務利潤率仍有發展空間，只要唔受政治或貿易管制，集團嘅地域發展會變得多元化，未來海外業務佔比甚至有機會超越內地。
聶Sir又相信，近日中美關係又轉趨緊張，廠商會減少對美國晶片嘅依賴，生產自強會繼續成為催化劑，所以天岳先進前景仍值得憧憬及保持樂觀。
