【now.com財經】本港以至全球經濟前景唔明朗，各行各業都面對經營困局，結業、裁員消息不絕，有本地傳媒引述消息指，早前派咗全年成績表，雖然面對激烈競爭，但仍多賺近2%兼維持派末期息嘅數碼通電訊(00315)，上星期有裁員行動。
消息指，數碼通其實早於去年9月，已開始低調裁員，每次炒人數目都唔多，而上星期就向約30名員工「派大信封」，包括總經理及助理經理等職級，又估計呢一波裁員合共炒約60人。
集團喺上周五(5日)向受影響員工「派大信封」，仲要即時「起身」，但集團嘅招聘網仍有十幾個空缺，今次疑似係「換血行動」。
至於數碼通股價今年表現唔算差，暫時累升逾13%，而傳出裁員消息後，股價今早(9日)冇乜變動，最新報4.71元。
