【Now財經台】阜博集團(03738)股價今日(4日)走勢同大市差唔多，開市後好快見咗日內高位6.05元，之後跌幅不斷擴大，一度挫逾11%，低見5.26元，收市報5.36元，大跌10%，成交股數較過去100日同時段平均增1.2倍。
其實上月已有資金偷步炒阜博業績，股價成功突破上落格局，呢段時間累升逾70%，14天相對強弱指數(RSI)一度見過86。
靚業績「見光」後，投資者急急獲利利場並唔出奇，值得留意係，阜博係北水愛股，截至昨日(3日)止，北水持股佔比達40%，8月初股價起步時，北水持股約35%，投資者不妨留意北水持股變化，如果佢哋減持獲利，阜博股價下行壓力就唔細。
