【Now財經台】杭州六小龍之一嘅宇樹科技昨日(2日)指，最快10月就會遞交IPO申請，今日(3日)港股嘅機械人概念股集體炒上，當中包括首程控股(00697)，其實公司都有消息，首程旗下北京機械人產業基金投資宇樹，持股約4%。首程今年2月成立機械人公司，依家再入股宇樹，睇返公司股價，由1元起步，升至現水平已累升逾1倍，利好係咪已經反映晒？
元宇證券基金投資總監林嘉麒認為，首程應該陸陸續續會有憧憬，雖然股價已累升逾1倍，但好難判斷現價係咪已反映晒所有利好，首程持有唔少機械人產業基金，雖然每隻投放嘅資金唔多，但勝在投放範圍夠廣，如果集團持有嘅機械人產業基金上市，市盈率(PE)就會多好多，首程仲要係IPO上市前嘅初始投資者，買入價較平，依家首程市值逾170億元，未來有機會變得更大。
KK續指，由於首程做資產管理嘅產業基金步入收成期，股價未來或會有好大上升空間。
