【now.com財經】有「內地國產人工智能(AI)晶片第1股」之稱，被市場寄予厚望成為「國產英偉達」(Nvidia)嘅寒武紀科技(688256)，昨日(28日)終於踢走貴州茅台(600519)，正式「坐正」成為「A股新股王」，隨著寒武紀成為「AI股新星」，佢「背後兩個人」亦成為焦點。
首先係有「天才少年」之稱，寒武紀創辦人陳天石，佢喺2016年創立集團，以公司最新市值逾6600億人仔計，「身價」高逾2300億人仔。
另一個係寒武紀「神秘超級散戶」，據內媒報道，呢名散戶係從來唔接受訪問、唔公開發言，連樣貌都冇人知，叫章建平嘅人士。如果睇返數據，佢係去年買入寒武紀股份，據最新數據顯示，佢依家持有逾600萬股，以寒武紀昨日(28日)收市價計，貨值逾90億人仔。
報道又指，市傳章建平係江淅地區嘅元老級散戶，操作手法非常厲害之餘，資金實力亦非常雄厚，擅長吼準時機，喺目標股票升浪中重槌出擊，並大有斬獲。
「A股新股王」寒武紀股價今日(29日)要回一回氣，最新報1498.99人仔，跌近6%。
