【Now財經台】IGG(00799)昨日(27日)出咗業績，股價今早裂口低開9%後，跌幅一度擴大至逾13%，低見4.3元，成交股數較過去100日同時段平均增6倍。
IGG呢份中期業績幾條大數都唔算好差，收入按年微跌，純利就按年跌唔夠3%，主要係成本控制得好，期內銷售成本按年大減20%，毛利率改善至83%，係近年高水平。此外，集團派息都算慷慨，中期連特別息合共派0.139元，派息比率近50%。
不過，仍然留唔住小股東，今日持續捱沽，可能投資者認為呢份業績睇唔到增長前景。
IGG今日一跌，已失守50天線，暫時阻力位喺4.5元水平，值得留意係，集團手頭現金有25億元，可能隨時出手回購，到時應該會對股價有支持。
