【Now財經台】美國聯儲局主席鮑威爾(Jerome Powell)喺Jackson Hole全球央行年會「放鴿」，暗示9月有機會減息之後，唔少科技股喺高位回套，令市場要諗諗美國科技股係咪已經太貴，需要有一個較大嘅調整，點睇市場呢個諗法？
星漢資產管理行政總裁王榮昆指，美國科技股嘅壞消息已開始發酵，例如英特爾(Intel)一旦攞唔到外部人工智能(AI)定單，甚至退出晶片製造業務等，每個壞消息都令市場對科技市場觀感好差，呢個亦係科技股近期弱勢嘅原因之一。
不過，James指出，其實真正引發市場對科技股憂慮，係麻省理工學院(MIT)嘅生成式AI(Gen AI)報告，報告指，AI行業中，有95%相關企業都係零回報，又指AI泡沫正在形成中，呢份報告令市場諗返起2000年《巴倫周刊》(Barron’s)一份報告令互聯網泡沫爆破，因此，市場擔心MIT呢份報告會唔會令AI泡沫爆破，不過，James補充，兩份報告其實唔太相似，市場唔需要太擔心。
