【Now財經台】海底撈(06862)上半年業績麻麻，少賺13%之外，中期息亦減少14%，股價今日(26日)一度重挫逾6%，低見13.92元，更一度下試10天、20天線，想博反彈應該點部署？
法興銀行證券上市產品銷售部董事周翰宏指，海底撈出業績前，股價一度見過15元，之後落返13.7元水平先搵到支持，雖然依家有一條好長嘅下影線，但如果今日收市可以企穩50天線水平，股價走勢未必太差。
Horace又指，如果投資者想喺底部博反彈，可以考慮用CALL輪，但要留意，投資者唔好揀引伸波幅較高嘅產品，產品方面，市場現有選擇唔多，主要以價外為主，明年4月到期，時間值損耗唔算好大，可以考慮行使價19至21元，實際槓桿3至4倍之間嘅產品。
