【Now財經台】被市場形容處於慢牛狀態嘅A股，近期持續強勢，其中，上證綜合指數企穩10年高位，而上月流入A股交易所買賣資金(ETF)嘅資金明顯增加，昨日(25日)滬深兩市成交衝破3萬億人仔，係歷來第2多，到底A股今輪升浪係10年一遇嘅大牛市，還是只係去年10月嘅資金市翻版？
博威環球證券金融首席分析師聶振邦指，今輪資金升市同去年10月明顯唔同，因為去年升市有國策喺背後推動，多咗資金入市，但現在嘅情況係，既冇國策推動，亦冇利好消息，但交易規模已大過去年10月，反映投資者對A股前景非常有信心。
聶Sir又話，雖然A股好大機會繼續上，但要留意上證指數4000點係一個重要心理關口，如果現階段入市或會有變數，已經入市嘅投資者可以留意上證指數，今個星期上唔上到4000點，再吼位沽貨獲利。
