【Now財經台】全球矚目嘅Jackson Hole全球央行年會，將會喺美國時間周四至周六(21日至23日)，喺懷俄明州傑克遜湖旅館(Jackson Lake Lodge)舉行，重頭戲係美國聯儲局主席鮑威爾(Jerome Powell)，將會喺本港時間今晚10點發表演講，市場可唔可喺佢嘅言論中搵到減息線索？點睇美股後市？
勝利證券首席顧問陳建良認為，聯儲局9月好大機會唔減息，又認為投資者未來3個月不宜對美股睇得太樂觀，建議減少持倉。
KL續指，市場依家受關稅、俄烏戰事等因素影響，仍有好多不確定，相信鮑威爾同美國總統特朗普(Donald Trump)嘅角力會令股市出現動盪，而美股係傾向升慢急跌，如果持有大量貴價股會好難轉身。佢又估計，美股有機會出現大調整，其中，納斯達克100指數有機會挫3000點至21000點水平。
