【now.com財經】噚日諗住再嚟多次出淡倉，博指數向下殺落去24,700至24,799點嘅重貨牛，但指數最後低開高走到連個開市裂口都補埋，即使之後有見小時圖上撲返上100/150線多一次，但呢一撲即過線，並唔係撲上線前見阻力，所以隻淡倉都係無出到。
還好無出，皆因噚日下半場指數愈升愈有，重補返噚日個下跌裂口，好腰好腎咁，怪不得今日近牛企滿晒街貨，首三層牛證每層都有過千張期指街貨，話係近牛因為真係首三層嘛，但第一層喺24,800至24,899點，依家9點58分，以恒指報25,122點計，唔好話食晒，去到門口呀，都要向下再落多223點先至到。
真係唔好諗得太遠，今日作戰室出淡倉都只係近近地睇返大約25,100點呢個位，仍然都係數點數出Trade。
依家10點16分，恒指暫時都仲玩緊燈掣，撳過去隔離街探下隻Popmart(09992)，咦?!小時圖做乜出高位「陀螺」呀? 咁搞法Vivienne會有啲肚餓架喎。
講明先，Put Popmart係喺焦點股世界嚟講係一個極度任性嘅行為，而如果講求Day Trade要快嘅，用高槓桿嘅熊證可以，但拉遠啲唔該，例如(68148)，收回價348元，為市場上最遠嘅popmart熊，槓桿有約8.8倍，Day Trade夠架啦。
擔心都係會被打靶嘅話，當然仲有Put揀啦，但唔好預啲Put好近，例如第二貼價(19191)，行使使248.88元，已經同現價有逾21%價外距離，低引伸都係佢賣點嚟架。
作者阿珊，以技術分析專心玩輪證，唔貪心，努力賺取我家肥貓罐罐ฅ^•ﻌ•^ฅ。
直接去Patreon搜尋「cbbcwar」領取七日免費試用即市作戰教室
