【Now財經台】特步國際(01368)今日(18日)中午出咗業績，整體收入68.3億人仔，按年增長逾7%，派中期息18港仙，特步股價午後一度衝高近10%，高見6.3元，係咪反映呢份業績有驚喜？
博威環球證券金融首席分析師聶振邦指，今次最大驚喜係特步剝離咗虧損業務，令未來業績可以保留值得憧憬嘅部分，雖然盈利及收入略低過預期，但喺零售市場「內捲」嚴重下，收入仍有7%增長，毛利率就超過40%，都會畀到信心市場。
聶Sir又話，特步能保持強勁盈利能力，主要睇公司喺定位方面有咩考慮，估計會用一個雙線策略，即網店跟門市同步去做，喺控制成本方面會有優勢，佢認為，特步有好大追落後本錢，股息率又吸引，建議有貨投資者繼續揸，目標價睇6.8元水平。
