【Now財經台】美國總統特朗普(Donald Trump)上周五(15日)表示，可能會喺一至兩星期內向進口半導體產品加徵最高300%關稅，勢大大打擊科技巨企如蘋果公司(Apple Inc.)、英偉達(Nvidia)及AMD等，消息令晶片股受壓，不過，市場似乎已經對特朗普嘅貿易談判技巧見慣不怪，未有太大反應，喺關稅戰影響下，應該點部署揀股會較穩陣？
黃國英資產管理董事黃國英指，市場對消息反應唔算大，始終加徵半導體關稅300%唔實際，相信亦會有豁免條件，所以大家都不如以往咁認真看待呢類消息，加上市場對「習特會」有憧憬，暫時仍對市況睇得樂觀，但要留意，大多涉及實體銷售嘅公司表現都較差，如零售業等，因此，不妨多留意同網上業務相關嘅股份就會比較穩陣，例如網上購物平台或服務等。
佢又話，亦可以留意羅素2000指數會最明顯受惠於美國減息，但都要視乎行業，尤其涉及房地產嘅科技公司或交易平台因為高槓桿及高BETA，而更有優勢。
