【Now財經台】美國7月消費物價指數(CPI)及生產物價指數(PPI)已先後出爐，正當市場以為CPI數據令聯儲局9月減息機會大增之際，PPI升幅爆冷遠超市場預期，或令8月CPI急升，點解7月PPI高過市場預期咁多？月初非農數據公布後，美股出現波動，但3大指數昨晚(14日)表現冷靜，係咪相比通脹，市場更擔心勞工市場嘅情況？
冠域商業及經濟研究中心主任關焯照指，7月PPI可以睇到關稅嘅影響，尤其係原材料大幅加稅後，佢又指，CPI走勢要視乎企業會唔會將關稅成本轉嫁畀消費者，但喺經濟環境欠佳時，企業就會諗辦法自己「啃」關稅，例如用人工智能(AI)技術降低成本，所以8月CPI未必一定大升，現時數據模型預測，美國通脹會升0.3%至0.4%。
關博士又提及，勞工市場數據滯後，亦好影響消費情緒，所以比通脹更能反映經濟，雖然勞動市場情況較2、3年前有改善，但仍然唔係一個理想水平。
