【Now財經台】361度(01361)股價今早(13日)平開後，隨即向下，最多跌逾12%，低見5.57元，主動沽盤逾60%，收市跌逾9%，報5.76元，全日成交股數較過去100日同時段平均增逾7倍，成交金額逾3億元，最少是5年以來最多。
集團昨日(12日)出咗中期業績，收入按年增長11%至逾57億人仔，純利8.58億人仔，按年增長8.6%，中期息都派多咗，但毛利率只係維持約41%，361度股價今日急挫可能同部分資金趁好消息出貨有關。
睇返技術走勢，股價今日失守10天、20天線後，8月以嚟嘅升幅亦化灰，未來幾日要留意50天線，即5.24元平有冇支持，股價係咪可以回穩，又或者有冇消息跟尾。
