【Now財經台】截至早上11時止，1小時內《彭博》用戶搜尋量最多嘅港股，依次為新世界發展(00017)、小米集團(01810)、石藥集團(01093)、新鴻基地產(00016)及泡泡瑪特(POPMART)(09992)。
有消息指，新世界及控股股東鄭氏家族，跟黑石集團(Blackstone Group)討論一項25億美元潛在交易，刺激新世界股價今日(7日)一度飆16%，高見7.52元，衝上8個月高位，呢個利好消息反映晒未？
椽盛資本投資總監曾永堅指，新世界依家最重要係盡快將旗下核心及非核心資產，以貼近成本價出售套現，或者同潛在投資者合作，都有助紓緩部分財務壓力，畀市場睇到公司財務狀況持續改善，會對股價有利。
Jaseper又話，新世界股價今日大升，可能同技術因素有關，因為早前累積咗唔少沽空盤，令股價喺6元至6.5元形成阻力，依家股價成功突破阻力，迫使沽空盤平倉，會加強股價上升動力。
佢續指，新盤市場交投暢旺，加上市場預期美國會喺今年餘下時間減息2次，相信呢啲消息短期會對新世界股價帶來上升動力。
