【Now財經台】東方甄選(01797)過去兩年經歷唔少波折，包括知名主播董宇輝出走、自營產品又爆出檢測超標風波，令股價一度低迷，不過，集團靠自家研發App翻身，股價過去1個月累升1倍，北水持倉亦增至29%，但股價喺30元水平有阻力，現價係咪已反映晒潛在增長憧憬？
天風國際李偉傑指，同業快手(01024)用戶量逾4億，市值逾3000億元，相比之下，東方甄選用戶量僅逾20萬，市值約200億元，所以市場認為東方甄選有好大追落後空間，一直憧憬市值膨脹，但值得留意係，東方甄選14天相對強弱指標(RSI)已去到近95嘅極度超買水平，利好因素亦反映咗唔少，加上公司就快出業績，如果同市場預期有落差，就算利好消息將股價推上30元都未必企得穩。
Jason又指，北水持倉佔比約29%，雖然相比起上月嘅27%有所增加，但唔算好多，所以佢唔建議喺極超買水平下再追入。
