【Now財經台】內地3大外賣平台嘅補貼大戰似乎暫告一段落，不過，美團(03690)股價上周五(1日)微升後，今日(4日)再度受壓，一度低見119.9元，跌1.8%，其後跌幅收窄。近期美團好倉較受投資者歡迎，5日合計，有約3440萬元坐貨，係資金流入第3大個股，雖然股價今日再跌，但跌至低位有反彈，好友有冇繼續做進取部署？淡友今早食唔食得切糊？
滙豐亞太區財富管理香港上市產品銷售經理盧貴良指，市場繼續關注外賣平台競爭，官方喺剛過去嘅周末指，會推出合規指南打擊外賣平台不合理收費。
佢又話，成交活躍嘅CALL，條款傾向返保守，行使價擺146元，明年3月到期，實際槓桿5倍。資金流方面，牛證今朝止蝕離場，加返啲PUT輪，條款方面可以考慮行使價110元，12月到期，實際槓桿做到5倍。
